UM STÓRIA DI NATAL

visto por Lú di Pala, 1982

Um  Stória di Natal

 Dati, ki  bisti di Pai Natal.,

 xinta na banku réu

 di «Juis Disidi», di SIC pamodi ,

 si konbersu ku mininus.

D

izembru. Mês di fésta na tudu kantu di Mundu; mês di troka prizenti, di kumpra ropa nobu… di kusas ki duranti anu nu pensa na el; mês di mésa fartu pa kem ki podi; mês ki ningém ka ta lembra ma Janeru é mês más kumpridu di anu. Mês ki mininu di tudu Mundu ta dizeja um prizenti di Mininu Jezus.

Ruas di Lisboa, sima rua di kalker Sidadi na Mundu, sta koadjadu di moradoris y di gentis  ki bem di fóra. Legria na rostu di uns ta kubri tristeza di otus ki nada ka tem. Lojas borotadu di gentis ki dja skese di papia na ton sertu... di ri altu, di tudu i di nada...

Móntras di tudu kusa: di ropas más finu y di tudu kolidadi na korpu di manikins; di mésas frankiadu di manjar más pititozu; di brinkédus di tudu kolidadi, enfim, un mundu di vaidade… di dezeju; mês di rikus mostra si teres na óra di djuda grupus di boa vontadi, ki ta proveta tempus di festa, pa ranja algum kusa pa festa di Natal di kes ki nada ka tem. Kantigas di Natal i di boas-festa na tudu loja.

Mininus di tudu kor - pobri, riku, ramediadu - ku féria di Natal sta na rua na grandi algazara, sima txota na figera, ta kore di un banda pa kel otu. Na présa di ken ki ta txiga más purmeru na móntra di brinkedus, ka ta falta nkontron, kedas… galu na kabésa kebradu   y duedju foladu.

Na lojas di Sentrus Kumersial sta Pai Natal, - um invenson di kumersiantis - ki toma lugar di Mininu Jezus, kumpanhadus di Mai Natal, otu modernidadi, pa nduzi mai ku pai pa kumpra kusas - as bes sen nisisidadi - staba ta purpara brinkaderas pa anima mininus na fésta. Na mei di tudu kel bran-bran, un kusa kontise... tudu pára. paradu... tudu konbersu kaba, tudu rostu, dimiradu, vira pa un ladu... tudu odju kai na un pontu... Kusé ki kontise?...

Nha rostu i nha odju kumpanha tudu kes rostu, tudu kes odju. Sen kré nha rostu suri, kantu N odja kuse ki fase tudu kes genti pára paradu, ku

odju nklistadu na kabésa…. Éra kusé?..

simplismenti un Pai Natal Pretu!

Sima nos grandi ta fla, Mundu é baston di sóka... ningém ka staba kontenti ku es nobidadi.. nem es ka lembra ma Mai Natal era un nvenson nobu…   es nfanhi rostu... ses pensamentu fika klaru sima lus di sol:

- Pai Natal negru, ki dia?... Na ki parti di Mundu?!!!!

 Dizembru 2002